رسالة لبنت خيالى

بكتبلك .. وأنا مش عارفك .. لا يهمني شاكلك .. ولا يهمني سنك .. بتخيلك زي ما أنا عايزك .. حنينة .. طيبة .. عاقلة … عنيدة ..
بصي .. أنا مش عارفك ومش عارف اقولك إيه .. بس عايز أتكلم معاكي .. أيوه عايز أتكلم معاكي وأنا مش عارف أنتي مين .. فوقي كده وركزي في اللي بقوله
 لأ أنا مش مجنون .. بس أنا عايز أكتب جواب لواحده بحبها من غير ماأشوفها ولا اعرفها .. حب بلا أمل .. اجمل من حب بلا طموح
اسمعي بس اللي بقوله .. أنا قولت افضفضلك لأنك الوحيدة اللي هتسمعيني وهتهتمي تكملي الجواب للأخر .. غيرك يا مش بيسمع .. يا بيسمع ومش بيهتم
عارفه ليه بحبك ؟؟ عشان مش هشوف منك حاجة وحشة .. هتفضلي في عنيا اجمل حلم وأحلى صورة رسمتها في خيالى لبنت خيالي .. أيوه بنت خيالي
بحبك لانك ثورية .. بترفضي كل غلط .. أنتي ضميري اللي عايش بيه لو عقلي تاه وغاب بيفوقه .. بس على الرغم من ده .. زيك زي غيرك مش هبطل سجاير
قولتلك قبل كده .. مش هنساكي .. أنتي حلم حلمته ورسمته وبنيته وهدمته يوم ماكتبتلك … مش عارف بس اتعودت ان لما الكلمة بتطلع .. الحقيقة بتموت

تم … تصبحي على خير

 

 

 

 

Advertisements