شخص مايكتب عن || 2011 .. من يناير لديسمبر يا قلبي لا تحزن

تدوينة عن ذكريات 2011 كتبتها يوم 15 ديسمبر في أعتصام مجلس الوزراء قبل فض الإعتصام وقبل أحداث مجلس الوزراء بكل اللي شوفته فيها من بلاوي …

صحيت من النوم 2011 بتنغزني في قلبي وبتفكرني بكل اللي حصل في السنة السودة اللي المفروض رجعنا فيها حريتنا

سنة نزلنا في إولها نطلب حريتنا وانتهت بينا في سجن كبيير اسمه مصر وسجانة مجلس عسكري

سنة ابتدت بفتح السجون وإطلاق المسجونين وانتهت بأحلال الثوار مكانهم في السجون الحربية

سنة ابتدت بتحية عسكرية للشهداء وانتهت باتهام الشهداء بالبلطجة والقتل !! زي مينا دانيال متهم في احداث ماسبيرو

01 يناير – كنيسة القديسين

25 يناير – عيش حرية عدالة اجتماعية واترد علينا بقنابل غاز وضرب ومدرعات بتجري ورانا

26،27 يناير – نفس انتهاكات الشرطة في يوم 25 واستمرار الاعتقالات والمطاطي

28 يناير – جريمة قتل منظمة راح ضحيتها اكتر من 400 مواطن

02 فبراير – موقعة الجمل واستخدام سلاح جديد ضد المصريين بعد فشل النار والرصاص والغاز

25 فبراير – فض الشرطة العسكرية للميدان وأول مرة تتعامل بعنف مع المتظاهرين

9 مارس – فض الاعتصام وقتل علي ماهر أول ضحايا الجيش والكشف علي عذرية المعتقلات وتعذيب المعتقلين

9 ابريل – فض إلاعتصام وتسليم صفوت حجازي ظباط 8 ابريل للجيش

15 مايو – أحداث سفارة اسرائيل في ذكري النكبة واستشهاد واحد وتركيع وتعذيب وأهانة المئات أمام السفارة بعد حرب الرصاص

28 يونيو – ضرب أهالي الشهداء عند مسرح البالون وبعدها معركة محمد محمود استمرت يومين

22 يوليو – مشيرة العباسية الأولي وتحريض الجيش ضدنا وهتاف الأهالي “خونة” علينا

23 يوليو – موقعة العباسية وحصارنا من الجيش والبلطجية والأمن المركزي وقتل محمد محسن ومئات المصابين

01 أغسطس – فض إلاعتصام وضرب أهالي الشهدا ودخول المسجد بالبيادة وبداية قوات حفظ النجيلة

09 سبتمبر – هدم جدار السفارة ومعركة السفارة ومديرية الأمن وحملة اعتقالات واسعة

30 سبتمبر – مسيرة لوزارة الدفاع واعتقالات وضرب كالمعتاد

06 أكتوبر – احتفالية وقف عجلة الانتاج وملايين طارت في الهوا

09 أكتوبر – مذبحة ماسبيرو وقتل 34 “مصري” دهسا وبالرصاص الحي وتلفيق القضية للثوار

19-25 نوفمبر – مجزرة الكيماوي وضرب متواصل غاز ومطاطي وحي وضرب الغاز من هوايات المترو

20 نوفمبر- فض الجيش للاعتصام وسحل الشهداء ومطاردتنا في الشوارع وضرب المصابين في المستشفي الميداني

وأخيرا 14 ديسمبر موقعة الحوواوشي وتسميمنا

اللي فات ده اهم الاحداث اللي تم قمعنا فيها لكن ممكن نفتكر احداث تانية غير مؤرخه

صباع الفنجري

شهادة المشير زور

مفيش ولا قاتل اتحكم عليه!! حتي اميين الشرطة اللي اتحكم عليه بالاعدام طلع براءة بعد كدة

بعدما قتل القناصة المتظاهرين في الميدان صدمنا العيسوي بالحقيقة المرة اننا معندناش قناصة

في 12000 مدني في السجون الحربية

الثوار بيتلفقلهم تهم جاهزة وبيتم احالتهم لمحاكم عسكرية

شوفنا اول محاكمة عسكرية بتهمة الشخبطة علي الحيط

وطبعا سطوع  نجم الفنان احمد سبايدر ابن اللواء الرويني علي حد تصريحة والعبقري توفيق عكاشة صاحب نظرية 13/13/2013 ودخل الزنازين علاء عبدالفتاح وعلي سلطان وعلي الحلبي وغيرهم من الشرفاء

اكتشفنا ان الاستفتاء لم يكن علي التعديلات الدستورية بل علي شرعية المجلس بناء علي تصريحات اللواء شاهين

والاهم خلصنا من نجوم الحزب والوطني واحتل مكانهم اعضاء المجلس العسكري كنجوم الفضائيات

لو قعدت سنة كاملة مش هقدر اقول اللي حصل ولا ادي ل 2011 او للمجلس العسكري حقهم

ده اقل القليل في تاريخ سنه كتبناه بدمنا وهنيتدي نكتب من اول وجديد تاريخ جديد 25 يناير 2012

عيد ميلاد ثورتنا هنكتب فيه تاريخنا من اول وجديد بحثا عن العيش والحرية والعدالة الاجتماعية

الطريق طويل وأحنا لسة في أولة … مكملين

لينك للتدوينة الأصلية … https://www.facebook.com/notes/kareem-emad-farid/2011-%D9%85%D9%86-%D9%8A%D9%86%D8%A7%D9%8A%D8%B1-%D9%84%D8%AF%D9%8A%D8%B3%D9%85%D8%A8%D8%B1-%D9%8A%D8%A7-%D9%82%D9%84%D8%A8%D9%8A-%D9%84%D8%A7-%D8%AA%D8%AD%D8%B2%D9%86/10150527715222037

Advertisements