شخص ما يكتب .. شهادته على أحداث ماسبيرو

شهادة على أحداث ماسبيرو كتبتها بعد الأحداث مباشرة مش كاتب فيها رأيي مجرد سرد للأحداث .. في واحد افتكرته مات وقت الأحداث وبعدها اكتشفت ان مفيش شهداء بسبب الاختناق

دي شاهدتي على اللي حصل أنا مش كاتب فيها رأيي أنا مجرد قولت الاحداث اللي حصلت 

كنت قاعد في أمان الله عرفت ان بلطجية هاجموا مسيرة متجهه لماسبيرو وبعدها عرفت ان في ضرب نار عند ماسبيرو, قررت اني هروح أشوف إيه اللي بيحصل

وصلت عند كوبري قصر النيل ومتجه نحو ماسبيرو قابلت صحفي الكاميرا بتاعته اتكسرت وهو مصاب في رجله والأهالي بيركبوه تاكسي وكل الناس بتجري وبيقولوا متروحش على هناك في ضرب نار وأنا كنت شايف الدخان وسامع الرصاص قبل ماأوصل.

مشيت شوية قدام وصلت عند الحزب الوطني لقيت جثة على الأرض وراس مفصولة عن الجسم ومشوهة والناس في حالة انهيار وكله بيعيط عرفت ان مدرعة دهسته, غطينا الشهيد بعلم مصر وناس كانت عايزة تشيله وتروح بيه الميدان بس قرروا في الآخر هيستنوا الاسعاف عشان حرمة الموت.

ببص قدامي لقيت تحت الكوبري عساكر الجيش بتحدف طوب على الناس اللي واقفة وكانوا ساعتها مش بيحدفوا أي حاجة كلهم كانوا ملمومين على الشهداء, وفوق كبري اكتوبر عساكر بتحدف توب على الناس اللي تحت وعلى مجموعة كانت واقفة فوق الكوبري.

كملت وقربت من العساكر ابتدى صوت ضرب النار تاني بس المرة دي كان مطاطيم اتصبت بيه أنا وأكتر من واحد حوليا وفي واحد الطلقه جت في دماغه بس الحمد لله اتعور بس عشان الطلقة كانت من بعيد كنت وقف جوه موقف عبد المنعم رياض.

اتجمعنا وكان في اشتبكات مع عساكر الجيش فوق الكوبري وعند هيلتون رمسيس جرينا وراهم لغاية مادخلنا عند ماسبيرو لقيت في أكتر من 5 عربيات مولعه وفي مدرعه محرقة وعدد كبير من العربيات المتكسرة, الجيش كان حاطط عربية سادد بيها الشارع عشان مفيش حد يعدي أول مدخلنا لقينا عربية مطافي متكسره جاهزه وال ناس كملت عليها.

كل ده مكانش في اشتباكات مره واحدة ابتدى ضرب تاني طوب وقنابل مسيلة ونار عشوائي, الناس تراجعت لعبد المنعم رياض المجموعات كلها اتشتت لقيت راجل كبير في السن واقع على الأرض ومش قادر ياخد نفسه حولنا نفوقه معرفناش ومرة واحدة لقيت الناس بتصوت وبيقولوا ده مات مقدرتش أروح جنبه قعدت وبعد كده روحت للمجموعة اللي متجمعة قدام هيلتون رمسيس هناك لقيت جيش أمن مركزي وبلطجية مع بعض بيحدفوا طوب وقنابل مسيلة.

استمر الوضع كر وفر ومع استمرار القنابل المسيلة والاغماءات ومفيش إسعاف بتوصل الناس اتحركت ناحية الميدان م ووقفوا تحت الكبري الجيش وال أمن المركزي والبلطجية طاردونا وقفنالهم جت عربية مطافي فض الشغب كانت بتجري وسط الناس وقدرت تهرب التانية جت والشهادة لله المتظاهرين اللي ابتدوا بالهجوم عليها وإزازها اتكسر السواق خبط موتسكل وطلع فوق الرصيف افتكرنا اللي كان سايق الموتوسيكل مات بس الحمد لله كان نط من عليه قبل مايتخبط طبعا اكتشفنا انه سليم بعد ماالعربية اتكسرت.

وقفنا ناخد نفسنا لقينا الجيش وال أمن المركزي والبلطجية بيطاردونا بالطوب فضلنا في كر وفر معاهم فترة طويلة الحمد لله محصلش فيها اصابات في شيخ جه وخد ايد قبطي وهتفوا مسلم ومسيحي ايد واحدة وبيتحركوا في مسيره نحو ماسبيرو ابتدت من تحت الكوبري أول ماوصلنا الهيلتون ابتدى الضرب تاني وابتدت القنابل المسيلة  مع الطوب الناس رجعت على أول الميدان اضربت كام طوبة محترمين في اماكن متفرقة ومع التعب ماكنتش قادر اقف رحت طلعت حرب أرتاح شوية وأجيب أي حاجة اشربها وأرجع.

قعدت تقريبا نص ساعة جيت اتحرك لقيت ضرب نار وعساكر الجيش بتجري ورا الناس جيت اتحرك ناحيتهم دخلوا بنزينة موبيل اللي قدام البورصة واعتقلوا ناس واقفين جواها وطلعوا يضربوا في أي حد واقف قدامهم الناس كلها جريت والعساكر بتحدف علينا طوب, جريوا ورانا شوية والظابط قال لي هاجيبك ورجع وأنا وقفت وهما راجعين لقيت الناس بتهتف الجيش والشعب ايد واحدة

حاولت ألف وأوصل الميدان معرفتش, قابلت ناس اعرفهم ومشيت لاني كنت خلاص جبت اخري

ملحوظة:

1- المتظاهرين عند ماسبيرو كانوا مسلمين ومسيحيين ومفيش واحد قال هتاف طائفي

2- اضرب علينا خرطوش ومطاطي وقنابل مسيلة وأزاز  وطوب

3- الجيش والأمن المركزي والبلطجية كانوا ايد واحدة

4- الشهدا اللي شفتهم ماتوا دهس أو اختناق

وده فيديو واضح لقتل المتظاهرين

http://www.youtube.com/watch?v=6pmz_ks3MFA&sns=fb

مدرعة محترقة

 

موتوسيكل دهسته عربية مطافي أثناء هروبها من غضب المتظاهرين في عبد المنعم رياض

 

 

 اللينك الأصلي للتدوينة … https://www.facebook.com/notes/kareem-emad-farid/%D8%B4%D9%87%D8%A7%D8%AF%D8%AA%D9%8A-%D8%B9%D9%84%D9%89-%D8%A7%D8%AD%D8%AF%D8%A7%D8%AB-%D9%85%D8%A7%D8%B3%D8%A8%D9%8A%D8%B1%D9%88/10150409886327037

Advertisements